Dipolog: Paglugway sa 20% nga diskwento sa full-payment sa real property tax ning tuiga gi-uswag

Mainiton karong nagpahibalo ang buhatan sa Tresorero ning siyudad sa Dipolog ang paglugway sa 20% nga diskwento alang niadtong mobayad sa ilang tibuok balayranan sa pingkasan sa yuta ug kabtangan alang ning tuig 2024, ang padayon pang mapahimuslan hangtud sa Enero 31, ning tuiga.

Mao kini ang nasayran kang Assistant City Treasurer, Herminia B.  Sabando sayo ning semanaha. Matud pa niini, nga isip dugang pagdasig sa atong mga magbubuhis nga mobayad sa ilang mga obligasyon, mihimo sa pamaagi ang ilang buhatan aron katabangan usab ang  atong mga magbubuhis.

Dugang nasayran, nga sa matag tuig, nahimong usa sa mga obligasyon niadtong mga nagbaton og mga kayuta-an ug kabtangan ang pagbayad sa ilang mga pingkasan, sigun sa gitakda sa atong balaod, busa, milugway usab ang kagamhanang lokal ning atong siyudad, ilawom karon sa kasamtangang liderato ni City Mayor Darel Dexter T. Uy ning maong pribilihiyo, isip tabang ngadto sa atong mga magbubuhis.