Gihisgutan ni Mayor Seth Frederick Jalosjos ang nasinati nga unang engkwentro niini isip mayor mao ang nahitabo nga landslide sa nasudnong dalan sa Brgy. Sto. Niño sakop sa dakbayan sa Dapitan kaniadtong Hulyo 1 sa may alas 10 ang takna sa gabie.
Sumala sa mayor nga dali gilayon siya nga miresponde sa lugar aron pagsuta sa sitwasyon og mahatagan sa hinanali nga aksyon ang nahitabong pagdahili sa yuta.
Hinuan swerte nga walay naangol atol sa insidente gawas lang nga temporaryong gisirad-an ang dalan sulod sa pipila ka oras.
Matud ni Jalosjos nga human nadawat nga report, gilusad dayon ang clearing operation sa quick response team sa kagamhanang lokal nga gilangkuban sa City Disaster Risk Reduction Management Office, City Engineer’s Office, ug Taguilon Fire Sub-Station.
Gumikan niini, nagtambag si Mayor Bullet sa mga katawhang nanimuyo sa dapit nga daling mabahaan ug humokon nga yuta nga magmabinantayon panahon sa kusog ug kanunay nga pagbunok sa ulan.
Source: CITY INFORMATION DIVISION-DAPITAN Facebook page
