Padayon nga gipalig-on ang kahibalo ug kahanas sa mga mag-uuma pinaagi sa Electrical Installation and Maintenance NC II training nga gipahigayon sa Zamboanga del Norte 2nd Provincial Mobile Force Company (ZNPMFC) ug mga kauban nga ahensya niadtong Abril 6, 2026.
Niabot na sa ika-unom nga adlaw ang maong pagbansay alang sa mga miyembro sa CYMPIL Situbu Alsa Farmers Association, nga gidumala sa R-PSB Team sa 2nd Provincial Mobile Force Company ubos sa liderato ni PLTCOL Edwin D. Verzon, sa pakigtambayayong sa TESDA electrical specialist nga si Al-Fonso Benlot Jr.
Gipunting sa training ang mga batakang kahanas sa hustong electrical wiring ug pagplano, isip kabahin sa pag-andam sa mga partisipante alang sa certification sa Electrical Installation and Maintenance NC II.
Apan labaw pa sa teknikal nga kahibalo, gipasiugda sa mga tigpasiugda nga ang maong programa usa usab ka pamaagi aron mapalig-on ang kalinaw sa komunidad pinaagi sa paghatag og lig-on nga oportunidad sa panginabuhian.
Gilauman nga pinaagi sa maong training, mas daghang residente ang mahimong kwalipikado sa trabaho sa electrical field ug makatampo sa padayon nga kalamboan ug kalinaw sa ilang lugar.(IKEN B. GULLEM)
Source: Zamboanga del Norte 2nd PMFC