Malampusong gipangulohan sa 97th Infantry “KALASAGLAHI” Battalion, 1st Infantry “TABAK” Division, Philippine Army ang boluntaryong pag surrender sa mga loose firearms isip kabahin sa padayon nga pagpatuman sa Mobile Community Support Sustainment Program (MCSSP) ug Small Arms and Light Weapons (SALW) Management Program sa lalawigan sa Zamboanga del Norte.
Kini nga kalampusan sa kalihokan resulta sa lig-on nga pakig-uban sa komunidad, dayalogo, ug koordinasyon sa lokal nga mga opisyal ug katawhan. Pinaagi sa kusang-loob nga aksyon sa mga concerned nga indibidwal, gisurender ang nagkalain-laing klase sa mga pusil, bala, ug kagamitang pandigma aron malikayan ang ilang paggamit sa kriminal ug armadong kalihokan.
Isip kabahin sa MCSSP, gisurender sa mga kanhing NPA supporters ang mga pusil ug bala nga gituohang gibiyaan ug gipanag-iyahan sa nabungkag nga Main Regional Guerrilla Unit (MRGU) sa Western Mindanao Regional Party Committee (WMRPC).
Lakip sa mga gisurender nga armas mao ang M4 rifle, M1 Garand rifle, KG-9 9mm, homemade caliber .45 pistol, mga barrel assembly, bala sa nagkalain-laing kalibre, ug mga magazine. Sa laing may kalabutan nga hitabo ubos sa SALW Management Program, dugang pang mga loose firearms ug kagamitang pandigma ang boluntaryong gisurender, lakip ang M2 Carbine rifle, improvised shotguns, caliber .38 revolver, hand grenade, rifle grenade, ug dugang nga bala.
Nagpasalamat si Lieutenant Colonel Jessie G. Bergonia, Commanding Officer sa 97IB, sa mga sibilyang boluntaryong nisurender sa ilang mga pusil.
Gipamatud-an usab sa 97th Infantry Battalion ang ilang padayon nga paningkamot sa pagpatuman sa mga programang nagpalig-on sa kalinaw, panaghiusa, ug kalamboan, kauban ang lokal nga pangagamhanan ug nagkalain-laing sektor sa katilingban.(IKEN B. GULLEM)
Source: 97th Infantry “kalasahlahi” Battalion