DIPOLOG CITY — Siyam (9) ka pasyente ang malampusong nakapahimulos sa libreng operasyon sa mata ubos sa programa sa City Government of Dipolog, ug mibisita kang Mayor Roberto Y. Uy aron ipadayag ang ilang pasalamat sa maong inisyatiba.
Ang mga benepisyaryo kabahin sa ikaduhang batch nga naoperahan niadtong Enero 22, 2026 sa St. Therese Hospital sa Oroquieta City pinaagi sa koordinasyon sa siyudad ug mga medical specialists. Wala’y gibayran ang mga pasyente sa operasyon nga kasagaran mahal ug dili maabot sa pamilyang adunay limitadong kita.
Sumala sa mga nakabenepisyo, dako ang kausaban sa ilang panginabuhi human maulian ang problema sa panan-aw nga dugay nang nakaapekto sa ilang trabaho ug adlaw-adlaw nga buluhaton. Giubanan usab ang programa og pre-operative assessment ug post-operative monitoring aron masiguro ang luwas nga pag-ayo sa mga pasyente.
Gipahibalo sa City Government nga adunay ikatulong batch nga pito (7) ka indibidwal ang gikatakdang maoperahan karong Pebrero 26, samtang nagpadayon ang administrasyon sa pagpalig-on sa accessible nga serbisyong panglawas alang sa mga Dipolognon.(JENIFFER JR. DELICA)
Source: Dipolog City Government