Hangtud karon padayon pa ang gihimo nga imbestigasyon sa kapolisan ning lalawigan kalabot na sa motibo ug suspetado sa pagluthang-patay sa usa ka miyembro sa Sangguniang Bayan, sa lungsod sa Pinan, sa miaging gabii didto mismo sulod sa iyang panimalay.
Kini ang gipamahayag ni Provincial Director PCOL Rainier Diaz sa Zamboanga del Norte Police Provincial Office atul sa Press Conference, kagahapong adlawa, tali na sa mga local media ug miyembro sa ZNPPO Press Corps nga gipahigayon sulod sa Conference Room, Camp Hamac, Sicayab ning dakbayan sa Dipolog.
Dugang ni PCOL Diaz nga hingpit pa nilang gitutukan ang posibleng anggulo sa maong insidente sama sa personal ug negosyo tungod kay ang biktima usa kini ka inila nga negosyante sa maong lungsod.
Ingon man, dili pa usab nila matumbok ang suspetsado sa maong krimen ug naga-base pa ang kapolisan sa kuha sa CCTV footage.
Hinuon, gipamahayag ni PCOL Diaz nga ang maong insidente dili maka alarma sa sitwasyon sa kahapsay ug kalinaw sa lungsod sa Pinan ug sa kinatibuk-an sa probinsya sa Zamboanga del Norte tungod kay usa kini ka isolated case.
Dugang ni PCOL Diaz nga nakipag-koordinar na usab sila sa CIDG aron mapadali ang pagsulbad sa maong kaso. Positibo ang maong Provincial Director nga dili na madugay ang pag-imbestigar sa maong kaso.
Kahibaloan nga si Sangguniang Bayan Glecerio “Agong” Rediilas, Sangguniang Bayan Member sa lungsod sa Pinan ug magpasubli magpapili sa umaabot nga eleksyon sunod tuig ang yano lamang gisulod sa supetsado sa iyang panimalay ug gipusil-patay.
Sa maong hitabo, giawhag ni PCOL Diaz ang publiko nga kanunay kitang magbinantayon ilabi na nga kung adunay nay naghulga sa imong kinabuhi ug dili kini ibalewala.
Dugang ni PCOL Diaz posible nga adunay nadawat nga pagpanghulga ang biktima sa wala pa nahitabo ang maong krimen ug dili lang buot ibutyag sa pamilya niini.
Giseguro usab sa kapolisan nga luwas ang pamilya sa biktima pinaagi sa paghatag ug security personnel nga mga miyembro sa kapolisan.
Gihugtan na usab sa kapolisan ang pagpahigayon sa check points sa lain-laing-laing lugar dinhi sa probinsya.
Niini, giawhag ni PCOl Diaz ang publiko nga makigpag-koordinar sa kapolisan kung aduna silay nasayran kalabot na sa maong krimen. (Angelica T. Obina)
(Source: PIC – Mischell Bala)