Pulos nakalas ang duha ka mga lalaki sa engkwentro tali sa kapulisan ug giingong armado sa Sityo Cambawag, Barangay Campo 4, Talisay City, pasado alas 2:00 sa kadlawon, Desyimbre 23, 2024.
Sumala ni PLtCol. Efraem Paguyod, hepe sa Talisay City Police Station, nakadawat sila og report bahin sa duha ka lalaki nga nagdala og armas sa maong lugar.
Dayon gilusad ang operasyon ug pag-abot sa mga pulis, gipabuthan sila sa duha, hinungdan sa pinusilay nga misangpot sa kamatayon sa mga suspek.
Sa lugar sa insidente, nakompiska ang tulo ka armas nga naglakip sa KG-9, kalibre .45, ug .38 nga revolver. Walo ka kabhang nga bala ang nakuha sa crime scene.
Padayon ang imbestigasyon aron masuta ang pagkatao sa duha ka mga lalaki ug ang posibleng mga krimen nga ilang nalambigit.
Gi-awhag usab sa kapulisan ang publiko nga magpabilin nga alerto ug mag-report og mga susamang insidente. (Renante Socia Lada)