Dakong tabang pinansyal ang midangat sa liboan ka mag-uuma sa humay human gipadayun ang distribusyon sa Rice Competitiveness Enhancement Fund–Rice Farmers Financial Assistance (RCEF-RFFA) sa Dakbayan sa Dipolog, kaniadtong Disyembre 23 didto sa D’Food Hub and Events Center, Dipolog Boulevard.
Ang mga benepisyaryo gilangkoban sa 6,833 ka mag-uuma sa humay gikan sa 1st District sa Zamboanga del Norte, lakip ang Dapitan City ug mga lungsod sa Mutia, Polanco, Rizal, Sibutad, ug Sergio Osmeña. Ang matag usa kanila nakadawat og Php 7,000 nga tabang pinansyal nga magamit alang sa ilang panginahanglanon sa uma ug produksyon.
Sumala sa mga mag-uuma, dako nga tabang ang pondo ilabi na karong taas ang gasto sa abono, binhi, ug ubang input sa pagpanguma. Ang maong kantidad kabahin sa kapin Php 47.8 milyones nga total nga gi-apod-apod sa ikaduhang adlaw sa programa.
Ang distribusyon gipangulohan sa Department of Agriculture Regional Field Office IX pinaagi sa Rice Program, uban sa City Agriculture Office, nga nagtumong sa paghatag direktang suporta sa mga rehistradong mag-uuma sa RSBSA.(IKEN B. GULLEM)
Source: Dipolog City Government