Nagpasiugda og lig-on nga suporta ang lokal nga kagamhanan sa Dakbayan sa Dapitan human opisyal nga ipahibalo ang paggahin og ₱500,000 nga pondo alang sa mga programa sa Persons with Disabilities (PWD) karong tuiga.
Kini nga pondo gipadayag atol sa unang quarterly meeting sa PWD Federation nga gipahigayon sa Government Center Amphitheater, diin gipresentar ang mga prayoridad nga kalihokan nga pagasuportahan sa maong budget.
Sumala sa administrasyon ubos ni Evelyn “Belen” T. Uy, ang ₱500,000 gitagana aron masiguro ang padayon nga implementasyon sa mga kalihokan nga motubag sa panginahanglan sa sektor. Lakip sa pagagamitan niini ang pagsaulog sa National Disability Rights Week (NDRW), International Day of Persons with Disabilities, regular nga quarterly meetings, ug year-end activity sa PWD community.
Gipasabot sa mga opisyal nga dili lamang kini simbolikong suporta kondili konkretong pondo nga magamit sa pagpalig-on sa organisasyon, paghatag og oportunidad sa partisipasyon, ug pagpauswag sa kalidad sa kinabuhi sa mga PWD sa dakbayan.
Pinaagi sa maong lakang, gilauman nga mas mapalig-on ang panaghiusa sa sektor ug mas mapaduol ang mga serbisyo sa gobyerno ngadto sa matag PWD sa Dakbayan sa Dapitan.(IKEN B. GULLEM)
Source: City Government of Dapitan