Nagpadayon ang mga kapulisan sa Cebu Police Provincial Office (CPPO) sa pagpalig-on sa ilang kampanya batok sa krimen sulod sa probinsya sa Sugbo gikan sa petsa Pebrero 16 hangtod 22, 2026.
Sa kampanya batok ilegal nga drogas, nakahimo ang CPPO og 47 ka operasyon nga misangpot sa pagkadakop sa 66 ka indibidwal. Narekober sa operasyon ang 57.15 gramos nga shabu ug 100 gramos nga marijuana nga nagkantidad og ₱400,620.00 sumala sa Standard Drug Price. Mokabat sa 111 ka kaso ang napasaka na sa korte batok sa mga nadakpan.
Sa pagpatuman sa mga warrant of arrest, nakahigayon ang kapulisan og 68 ka operasyon diin 77 ka warrant ang na-serve. Tungod niini, 15 ka wanted person ang nadakpan, lakip ang mga Most Wanted Person ug Other Wanted Person sa nagkalain-laing lugar sa probinsya.
Sa kampanya batok ilegal nga armas, 17 ka operasyon ang gihimo nga misangpot sa pagkadakop sa 9 ka tawo. Nasakmit ang 11 ka pusil ug 6 usab ka armas ang boluntaryong gitugyan sa kapulisan. Napasaka usab ang 11 ka kaso ug nakahimo og 4 ka OPLAN Katok operations.
Samtang, 13 ka operasyon batok ilegal nga sugal ang gihimo nga misangpot sa pagkadakop sa 20 ka indibidwal ug pagkarekober sa ₱2,507.00 nga kwarta sa sugal. Sa pagpatuman sa mga lokal nga ordinansa, mokabat sa 2,157 ka operasyon ang gihimo diin 1,411 ka tawo ang gipamulta ug nakatigom og ₱775,000.00 nga multa.
Sumala sa CPPO, kining mga kalampusan gipangunahan ubos sa liderato ni PCol. Abubakar Udang Mangelen Jr. aron masiguro nga magpadayon ang epektibo ug propesyonal nga serbisyo sa kapulisan alang sa kaluwasan sa katawhan sa Sugbo.
Source: CPPO
I via Renante Socia Lada