Mitambong ang nagkadaiyang lokal nga opisyales sa Zamboanga del Norte sa “Change of Command” Ceremony sa 97th Infantry Battalion sa Philippine Army kaniadtong Nobyembre 7, 2025, nga gipahigayon sa Headquarters sa 97th IB sa Brgy. Del Pilar, Piñan, Zamboanga del Norte.
Atol sa seremonya, pormal nga gitunol ni Lieutenant Colonel Jimmy J. Sanz ang pagdumala sa iyang katungdanan isip Commanding Officer ngadto sa bag-ong Battalion Commander nga si Lieutenant Colonel Jessie G. Bergonia. Ang turnover gipahigayon atubangan ni Major General Yegor Rey P. Baroquillo, Division Commander sa 1st Infantry “Tabak” Division.
Gipangulohan ang delegasyon ni Dipolog City Mayor Hon. Roberto Y. Uy, kauban si Zamboanga del Norte Governor Hon. Darel Dexter T. Uy, 1st District Representative Cong. Roberto “Pinpin” T. Uy Jr., ug Dapitan City Mayor Hon. Evelyn T. Uy.
Mitambong usab sa maong kalihukan si Brigadier General Samuel G. Yunque, Commander sa 102nd Brigade, ug Brigadier General Billy O. Dela Rosa, Commander sa 103rd Brigade, kauban ang uban pang mga opisyales sa Philippine Army ug mga dinapit nga bisita.
Nagpabiling lig-on ang suporta sa lokal nga pangagamhanan alang sa Philippine Army sa padayon nga paningkamot niini sa pagpanalipod sa kalinaw ug seguridad sa rehiyon.(IKEN B. GULLEM)
Source: Dipolog City Government