Gitutokan ni Gobernador Darel Dexter Uy ang mas episyente ug makatawhanong paghatag og serbisyo human pormal nga giabrihan ang bag-ong opisina sa One-Stop Assistance Center (OSAC) sa Zamboanga del Norte Provincial Capitol, kaniadtong Enero 26, 2026.
Atol sa inagurasyon, gibutyag sa gobernador nga ang tumong sa OSAC mao ang pagpakunhod sa kalisdanan sa mga nangayo og tabang, ilabi na ang paglikay sa sobra nga proseso ug pabalik-balik nga lakaw sa mga kliyente. Matod niya, responsibilidad sa matag kawani ang pagpakita og pasensya, pagsabot, ug sinsero nga serbisyo.
Ang OSAC natukod pinaagi sa Executive Order No. 2 ug nagsilbing sentral nga buhatan alang sa nagkadaiyang frontline services sa probinsya. Naglangkob kini sa walo ka yunit nga naghatag og tabang sa social services, panglawas, edukasyon, panginabuhian, legal nga mga kabalaka, ug uban pang panginahanglan sa komunidad.
Giduso usab sa gobernador ang aktibong partisipasyon sa publiko pinaagi sa paghatag og feedback ug suhestiyon aron padayon nga mapaayo ang kalidad sa serbisyo sa maong opisina.
Karon nahimutang na sa Ground Floor sa Kapitolyo ang OSAC, nga mas sayon duolon ug mas angay alang sa mga senior citizen ug mga katawhang adunay kalisdanan sa paglihok, isip kabahin sa paningkamot sa probinsya nga mapaduol pa ang serbisyo sa tanang Zamboangnon.(IKEN B. GULLEM)
Source: Zamboanga del Norte Provincial News Network