Gipahugtan sa Schools Division sa Dapitan City ang kahandaan sa mga eskwelahan sa pag-atiman sa mental health ug kaayohan sa mga tinun-an human ipahigayon ang Division Orientation on Referral Systems for Learners’ Health and Wellness niadtong milabay nga adlaw sa Monina’s Pension, Sunset Boulevard.
Gitumong sa aktibidad ang paghatag klaro ug epektibong giya sa mga magtutudlo ug administrador kon unsaon pag-ila, pagdumala, ug pag-refer sa mga kaso sa mental health sa mga learner, subay sa RA 11036 (Mental Health Act) ug RA 12080 (Basic Education Mental Health and Well-Being Promotion Act).
Gipangulohan sa mga eksperto gikan sa City Health Office ug social welfare sector ang diskusyon, lakip si Dr. Clay Merrell G. Barasi, nga mituki sa kasagarang mental health conditions ug sa mga serbisyong medikal nga magamit sa lokal nga lebel. Gitugotan niini ang mas hapsay nga koneksyon tali sa eskwelahan ug mga health facility sa siyudad.
Gisuportahan usab sa LGU Dapitan, ubos sa pagpanguna ni Mayor Evelyn T. Uy, ang maong inisyatiba isip kabahin sa paningkamot sa siyudad nga palig-onon ang kahimsog sa kabatan-onan.
Pinaagi sa maong kalihokan, gilauman nga mas lig-on ug mas andam na ang mga eskwelahan sa Dapitan City sa paghatag og hustong tabang sa mga learner nga nagkinahanglan og mental health support.(IKEN B. GULLEM)
Source: DepEd Tayo- Division of Dapitan City