Gidala sa Schools Division Office (SDO) sa Dapitan City ang “Oplan Kalusugan” ngadto sa Selinog Integrated School aron mahatagan og nagkalainlaing serbisyong panglawas ang mga estudyante ug mga magtutudlo sa maong isla.
Gipangulohan ni Schools Division Superintendent Dr. Jay S. Montealto, CESO V, ang maong inisyatiba pinaagi sa iyang representante nga si Medical Officer III Dr. Roderick M. Hamsirani. Uban sa School Governance and Operations Division (SGOD)–School Health and Nutrition Program, gipahigayon ang medical ug dental check-up, vision screening, ug pagmonitor sa School-Based Feeding Program.
Kabahin usab sa kalihokan ang pagpahigayon og mga orientation sa mental health, adolescent reproductive health, National Drug Education Program (NDEP), ug Disaster Risk Reduction and Management (DRRM) aron mapalambo ang kahibalo sa mga estudyante bahin sa ilang panglawas ug kaluwasan.
Pinaagi sa pagpasayon ni Board Member Jimboy Chan, gipirmahan ang Memorandum of Agreement (MOA) tali sa Rizal Masonic Lodge ug Selinog Integrated School, diin nagdonar usab ang organisasyon og duha ka basurahan aron mapauswag ang waste management sa eskwelahan.
Dugang pa, nanghatag usab ang Barak’s Milk Bar og mga masustansiyang produkto alang sa tanang estudyante ug mga magtutudlo isip suporta sa programa. Sumala sa SDO Dapitan City, ang maong inisyatiba kabahin sa ilang padayon nga paningkamot nga madala ang mga serbisyong pang-edukasyon ug panglawas bisan sa mga hilit nga komunidad.(IKEN B. GULLEM)
Source: DepEd Tayo- Division of Dapitan City