Napamatud-an na usab ang nagtubo nga interes sa ultimate frisbee sa Dapitan City human malampusong mahuman ang Kinabayo 2026 Ultimate Frisbee Invitational Cup niadtong Hulyo 19, diin gikoronahan ang Mixed Signals ug Conquerors isip mga kampeon sa ilang tagsa-tagsang grupo.
Kapin sa 225 ka mga atleta gikan sa nagkadaiyang bahin sa rehiyon ang miapil sa duha ka adlaw nga torneyo nga gipahigayon sa JRMSU Oval. Napulo ka mga koponan ang nagtinigi alang sa kampeonato, lakip ang GoodVibes, Isbotoy, Mixed Signals, 7100, Dapitan United, Bonakids, Conquerors, Bayacis, Mufasa, ug Discplay.
Sa Pool A, nasungkit sa Mixed Signals ang kampyonato, gisundan sa GoodVibes isip first runner-up ug 7100 isip second runner-up. Samtang sa Pool B, ang Conquerors maoy nagkampeon, uban sa Bonakids isip first runner-up ug Bayacis isip second runner-up.
Gihatag usab ang Most Spirited Team Award sa Mufasa tungod sa ilang pagpakita og taas nga lebel sa respeto, integridad, ug sportsmanship sulod ug gawas sa duwa.
Human sa awarding ceremony nga gipahigayon sa Alexandra By The Sea, gitapos ang torneyo uban sa paglaom nga mas daghan pa ang moapil ug mas dako pa ang kompetisyon sa umaabot nga edisyon sa Kinabayo Ultimate Frisbee Invitational Cup.(IKEN B. GULLEM)
Source: Dapitan City Government