Ang Oplan Harabas usa ka mahinundanung programa nga gihimo sa buhatan sa PDEA ZN-R9 pinanguluhan ni Agent V Ariel Escudero Provincial Officer PDEA, Zamboanga del Norte uban sa kooperasyon sa ZN Provincial Government,City Government of Dipolog, Dipolog PNP, Land Transportation Office (LTO), LTFRB, PNP Drug Enforcement Group ug Bagong Pilipinas. Diin gapahigayon ug random drug test ngadto sa tanang pampublikong driver gilangkuban sa mga Bus driver ingon man mga motor cab driver, didto sa Dipolog City Integrated Bus Terminal ning dakbayan sa Dipolog, Abril 14 ning tuiga.
Matud pa ni Agent Escudero adunay 300 ka drug testing kit ang gitunol sa Provincial Government para mamahimung malampuson ang Oplan Harabas 2025 inabagan usab sa Dipolog City Government ug ubang ahensya nga nahisgutan sa unahan.
Saysay ni Agent V Escudero ang maong aktibidad tumong ug tinguha nga mapaniguro ang seguridad sa mga pasahero kinsa ang driver dili kini nag positibo sa druga kay kung ugaling positibo kini mamahimung mabutang sa peligro ang pasahero niini panahon sa pagbyahe.
Ang buhatan sa LTO kinsa ang unang ahensya ang mipahigayon sa pagkuha sa drivers’ license sa matag driver adtong higayuna tungod sila lamang ang may gahum sa pagkuha ayha ang driver mo sulat sa porma nga gikan sa PDEA aron kini makapahigayon sa drug test inabagan sa mga personahe sa PDEA ZN.
Dugang pamahayag ni Agent Escudero kung ugaling mag positibo ang maong driver dili una nila ibalik ang ilang drivers’ license pasabot nga ang buhatan sa LTO ang temporaryo sang pugngan pagbalik kanila aron dili pa kini makapahigayon sa paningabuhi, mabalik lang kini nila kung ang maong driver naggumikan na kini sa 6 ka bulan nga drug intervention nga ipahigayon kanila pinaagi sa Barangay Drug Cleared Program kung diin sila lumolupyo nga barangay.
Ang maong aktibidad tinuig kining gipahigayon bisan pa man sa kalangan unta sa matag byahe apan angay nila kaning tumanon, tungod sayud ang tanan nga karon panahona nagkadaghan na pag usab ang druga sa Probinsya. Gipanglantawan karon sa PDEA ZN nga angay gayud silang ma drug test para sa sigurida sa tanang pasahero ingon man sa matag driver.(Angelica T. Obina)