Klarong direksyon ang gipakita sa probinsya sa dihang miapil ang Office of the Provincial Agriculturist – Zamboanga del Norte (OPAG) sa Healthy Public Food Procurement (HPFP) Playbook workshop nga gipahigayon sa Mibang Hotel, nga nagtinguha nga ilisan ang processed food sa mga transaksyon sa gobyerno og mas presko ug lokal nga produkto.
Ubos sa (HPFP) Policy, ipatuman ang mandatory nutrition standards sa tanang pagkaon nga paliton gamit ang pondo publiko. Nagpasabot kini nga limitahan ang pagkaon nga taas og sodium ug asukal, ug unahon ang preskong gulay, prutas, isda, ug bugas nga mas sustansiya sama sa unpolished brown rice.
Gipunting sa OPAG nga ang labing dako nga kausaban anaa sa sistema sa pagpalit: direkta nga koordinasyon tali sa gobyerno ug mga kooperatiba sa mag-uuma ug mangingisda. Sa maong pamaagi, ang suplay sa pagkaon sa mga pampublikong opisina ug institusyon magagikan mismo sa lokal nga prodyuser.
Gilauman nga pinaagi sa 9-ka lakang sa implementasyon sa HPFP, mahatagan og klarong giya ang mga ahensya sa gobyerno sa pagpalit og pagkaon nga mosuporta sa panglawas sa publiko ug sa kalig-on sa lokal nga produksyon.(IKEN B. GULLEM)
Source: Office of the Provincial Agriculturist