Nagpabiling aktibo ang Rural Health Unit (RHU) sa Sindangan sa pagpasiugda sa kahibalo ug pakigbatok sa HIV/AIDS isip pag-obserbar sa International AIDS Candlelight Memorial 2026.
Pinaagi sa temang “Light the Legacy: Remember. Advance. Act. Keeping the Light Alive,” gipahinumdoman sa RHU Sindangan ang publiko sa importansya sa paghinumdom sa mga naapektuhan sa HIV/AIDS ug sa padayong paglihok aron mapalig-on ang prevention ug treatment programs.
Gipasiugda usab sa opisina ang papel sa edukasyon ug komunidad sa pagpamenos sa stigma ug diskriminasyon batok sa mga persons living with HIV, samtang gidasig ang tanan sa pagpakita og suporta ug pagsinabtanay.
Matud pa sa RHU Sindangan, ang pakighiusa sa komunidad maoy usa sa labing importanteng lakang aron mapadayon ang awareness ug paghatag og husto nga impormasyon mahitungod sa HIV/AIDS.
Pinaagi sa padayong kampanya ug collective action, naglaum ang RHU nga mas daghang katawhan ang mahimong kabahin sa paningkamot alang sa mas himsog ug mas maalamong komunidad.(IKEN B. GULLEM)
Source: RHU Sindangan