Luwas nga gidala sa Zamboanga del Norte Medical Center Medical Team ang usa ka neonatal patient gikan sa Siayan, Zamboanga del Norte padulong sa Cebu City niadtong Marso 9, 2026 aron makadawat og espesyal nga medikal nga pag-atiman alang sa congenital heart disease.
Gipangulohan ni Herdina Gallegos ang medical team uban ni nurse Joel Rey Carcasona ug ambulance driver Reneboy It-It nga nagkuyog sa pasyente sa tibuok biyahe aron masiguro ang padayon nga pagmonitor sa kahimtang sa bata samtang nagpadulong sa ospital.
Sumala sa team, maampingong gibantayan ang kahimtang sa neonatal patient sa tibuok biyahe aron mapadayon ang husto nga oxygen level ug malikayan ang bisan unsang komplikasyon. Tumong sa transportasyon nga mahatagan dayon og mas angay nga espesyal nga pag-atiman ang bata sa mas kumpletong pasilidad medikal.
Gipasalamatan usab ang suporta sa liderato ni Darel Uy ug ang giya ni Esmeralda Nadela, hospital administrator sa ZNMC, nga mitabang aron mapadayon ang maong misyon sa paghatag og maayong serbisyo sa panglawas alang sa komunidad.(JENIFFER JR. DELICA)
Source: Zamboanga del Norte Medical Team