Gitigom sa Schools Division of Dapitan City ang 1,464 ka Rizal Shriners alang sa tulo ka adlaw nga kalihokan nga “Math is REAL: Let’s RISE! (Read, Illustrate, Solve and Enjoy)” Innovation Camp nga gipahigayon sa Dapitan City Central School ug Dapitan City Experimental School kaniadtong Marso 6–8, 2026.
Nagtumong kini sa pagpalambo sa praktikal nga kahibalo sa innovation, logic, ug problem-solving sa mga estudyante pinaagi sa lain-laing aktibidad nga nagpakita sa kahinungdanon sa matematika sa tinuod nga kinabuhi.
Samtang, gisuportahan sa 355 ka teaching ug non-teaching personnel, gipaila sa kalihokan ang mga bag-ong larangan sama sa robotics ug mathematical modeling, nga nagpakita nga ang matematika dili lamang usa ka subject sa classroom kundili usa ka importante nga himan sa modernong teknolohiya ug mga propesyon sa umaabot.
Matud ni Dr. Esmeralda A. Bagaipo, Education Program Supervisor sa Mathematics, ang inisyatiba nagdasig sa mga estudyante nga makakat-on pinaagi sa pagbasa, paghulagway, pagsulbad ug pag-enjoy sa mga mathematical concepts.
Dugang pa sa mga leksyon ug workshops, gipahigayon usab ang “Math in Motion” competitions ug Math Talent Show, diin gipakita sa mga Rizal Shriners ang ilang kahibalo sa matematika pinaagi sa arte, sayaw, ug performance.
Pinaagi sa paghiusa sa akademikong hagit ug mga creative nga kalihokan, gilauman sa Schools Division nga mas madani ang mga estudyante sa pagtuon sa matematika ug mas mapalig-on ang ilang kahibalo sa critical thinking ug innovation.(IKEN B. GULLEM)
Source: DepEd Tayo-Division of Dapitan City