Opisyal nang gisugdan sa Probinsyal nga Kagamhanan sa Zamboanga del Norte ang selebrasyon sa National Women’s Month pinaagi sa flag raising ceremony, nga naghatag og klarong mensahe nga mapalambo ang gender equality nga responsibilidad sa tanan.
Sumala sa mensahe ni OIC-PSWDO Hannah Lou G. Mandantes nga gipadayag ni Social Welfare Officer I Johanna Lozada, ang tema karong tuiga nga “WE for Gender Equality and an Inclusive Society” nagpunting sa panaghiusa. Dili lang kini isyu sa kababayen-an, kundili usa ka kolektibong paningkamot aron masiguro ang respeto, patas nga oportunidad, ug inklusibong kalamboan sa trabahoan ug komunidad.
Aron mapakita ang aktibong suporta, ipatuman sa probinsya ang nagkalain-laing kalihokan sulod sa bulan sa Marso, lakip ang “Kuyog Ta” Serbisyo Caravan nga maghatag og libreng serbisyo alang sa mga empleyado ug publiko. Giawhag usab ang mga empleyado sa pagsul-ob og purple matag Miyerkules isip simbolo sa pakighiusa sa kampanya.
Pinaagi niini, gipamatud-an sa Probinsyal nga Kagamhanan sa Zamboanga del Norte nga ang Women’s Month dili lamang selebrasyon, kundili konkretong lihok padulong sa mas patas ug inklusibong katilingban.(IKEN B. GULLEM)
Source: Zamboanga del Norte Provincial News Network