Nagpahigayon og courtesy visit ang mga opisyales sa Bureau of Jail Management and Penology Region IX sa regional office sa Department of Science and Technology Region IX aron hisgutan ang dugang nga kolaborasyon nga makatabang sa mga pasilidad sa prisohan sa rehiyon.
Gidawat ni DOST IX Regional Director Rosemarie S. Salazar, uban si Assistant Regional Director Ricardo J. Apolinario III, si BJMP IX Regional Director Gen. Amado A. Concepcion ug uban pang opisyal sa BJMP. Sa miting, gipasalamatan ni Concepcion ang suporta nga naunang gihatag sa DOST sa nagkalain-laing jail dormitories sa Rehiyon IX.
Gihisgutan usab ang posibleng dugang nga tabang sa DOST sama sa mga programa sa siyensya ug teknolohiya, capacity-building activities, ug mga livelihood initiatives alang sa mga persons deprived of liberty (PDLs). Tumong niini ang pagpalambo sa kahimtang sulod sa mga prisohan ug paghatag og mas maayong oportunidad sa rehabilitasyon.
Sumala sa duha ka ahensya, ang mas lig-on nga panagtambayayong magdala og mas epektibong serbisyo ug mas organisadong pagdumala sa mga jail facilities sa rehiyon.(IKEN B. GULLEM)
Source: DOST Regional Office No. IX