Gipahigayon sa National Irrigation Administration (NIA) Region IX pinaagi sa Zamboanga del Norte Regional Sub-Office (ZDNRSO) ang General Assembly Meeting sa Fadumadipila Irrigators Association (IA) didto sa Barangay Dicuyong, Sindangan, kaniadtong Oktubre 28, 2025.
Gipangulohan kini ni Regional Manager Engr. June Nathaniel Plaza ug Acting Manager Engr. Jessreel Intic uban sa mga opisyales ug miyembro sa Sindangan Communal Irrigation System. Gihisgutan sa miting ang mga kabalaka sa mga mag-uuma kalabot sa kadaot sa siphon nga nakaapekto sa ilang operasyon.
Gipasabot ni Engr. Plaza nga magsugod na ang pag-ayo sa siphon karong semana ug gisaad nga dili moundang ang ahensya hangtod maibalik ang normal nga serbisyo sa irigasyon. Iyang gisugyot ang paggamit sa steel siphon aron mas lig-on ug molungtad ang sistema.
Human sa miting, gibisita mismo sa mga opisyal sa NIA ang lugar aron masusi ang kahimtang ug mapadali ang aksyon. Gipasidungog ni Engr. Plaza ang kooperasyon sa mga mag-uuma ug iyang gipasalig ang transparente ug responsableng serbisyo sa ahensya.(IKEN B. GULLEM)
Photo courtesy: NIA Zamboanga Peninsula