Duol na sa 90 porsyento ang narehistro sa National ID dinhi sa Zamboanga del Norte base sa datos sa Philippine Statistics Authority kutob Pebrero 28 niining tuiga.
Sumala ni PSA Zamboanga del Norte Officer-in-Charge Andres Tapales Jr., nakaabot na sa 89.93 porsyento o kapin 959,000 ka indibidwal ang narehistro sa probinsya. Iyang gipahibalo ang maong datos atol sa 1st Quarter Meeting sa Provincial Statistics Committee nga gitambongan ni Governor Darel Dexter Uy sa Provincial Capitol sa Dipolog City niadtong Marso 13.
Gipasabot usab ni Tapales nga padayon ang mobile registration sa PSA sa mga barangay aron mapadali ang pagparehistro sa National ID sa katawhan.
Gipunting usab sa meeting ang mga hagit sa pagparehistro sa pipila ka senior citizen tungod sa kakulang sa dokumento sama sa birth certificate, hinungdan nga gipadayon sa PSA ang Birth Registration Assistance Project aron matabangan ang mga wala pa narehistro.(JENIFFER JR. DELICA)
Source: Zamboanga del Norte Provincial News Network