Malampusong gisaulog ug gitapos sa Corazon C. Aquino Hospital (CCAH) ang National Hospital Week 2026 pinaagi sa culmination program niadtong Agosto 14 sa CCAH Compound, Circumferential Road, Barangay Biasong.
Nahiuyon ang kalihokan sa tema nga “Juan Health for Juan Nation: Makabag-ong Teknolohiya sa Ospital nga Mapinanggaon,” nga nagpasiugda sa pagpalambo sa serbisyo panglawas pinaagi sa modernong teknolohiya ug mapinanggaong pag-atiman sa mga pasyente.
Mitambong sa panapos nga kalihokan si City Mayor Roberto Y. Uy, uban nila CCAH Chief of Hospital Dr. Jessie D. Tiu ug CCAH Chief Nurse Ms. Clarissa J. Darcera, nga mihatag sa ilang mga mensahe alang sa mga healthcare workers ug partisipante.
Kabahin sa maong panapos ang Awarding Ceremony alang sa mga mananaog sa nagkalain-laing sports activities sama sa Larong Pinoy, Volleyball, Pickleball, ug Basketball. Nahimong higayon usab kini aron mapasalamatan ang aktibong partisipasyon ug panaghiusa sa mga kawani sa ospital.
Gikan Agosto 10 hangtod Agosto 14, gipasiugda sa National Hospital Week 2026 ang camaraderie, kahimsog, ug kaayohan sa mga healthcare workers, uban sa paningkamot nga mapadayon ang dekalidad ug mapinanggaong serbisyo panglawas alang sa katawhan.(IKEN B. GULLEM)
Source: Dipolog City Government