Mikabat sa 32 ka mga paresan ang mipailalom sa Pre-Marriage Counseling ug Orientation Session nga gipahigayon sa City Mayor’s Office – Population Commission Division (CMO–PCD) kagahapong adlawa, Pebrero 5, 2026, didto sa Social Hall, 2nd Floor, City Hall, ning dakbayan sa Dipolog.
Gipangunahan ang kalihokan ni Population Officer IV Ms. Rochene Marie N. Baylon ug kabahin sa gipatuman nga mandato ubos sa Article 15 sa Republic Act No. 10354 o ang Responsible Parenthood and Reproductive Health Act.
Tumong niini ang pag-andam sa 32 ka magtiayon nga mosulod sa kaminyoon pinaagi sa paghatag og kahibalo ug giya kabahin sa responsibilidad sa mag-asawa, relasyon sa pamilya, ug kahimsog.
Nagsilbing mga resource speakers ang Dipolog City Police Station – Women and Children Protection Desk (DCPS-WCPD) nga girepresentar ni PCPT Charlot M. Lapiz, Social Welfare Officer III Mr. Roel R. Zorrilla, Population Officer IV Ms. Rochene Marie N. Baylon, ug City Nutrition Action Officer Ms. Riza Jane B. Zamoras.
Ang pag-apil sa 32 ka paresan sa maong sesyon usa ka rekisito alang sa “Twogether Forever” Mass Wedding nga ipahigayon karong Pebrero 13, 2026, nga gitanyag sa Lokal nga Kagamhanan ning dakbayan ubos sa liderato ni City Mayor Roberto Y. Uy.
Pinaagi sa maong kalihokan, gilauman nga mas andam ang 32 ka mga paresan sa pag-atubang sa mga responsibilidad sa kaminyoon ug sa pagtukod og lig-on, himsog, ug responsableng pamilya.(IKEN B. GULLEM)
Source: Dipolog City Government