Duyog sa pagsugod sa Kinabayo Festival 2026, opisyal nga gipakilala ang 10 ka kandidata sa Kinabayo Queen atol sa grand opening program, diin ilang gipasundayag dili lamang ang ilang katahom ug pagsalig sa kaugalingon kondili usab ang mga adbokasiya nga ilang isulong alang sa Dapitan City.
Nagrepresentar ang mga kandidata sa nagkadaiyang opisina sa kagamhanan, institusyon sa edukasyon, ug lokal nga mga establisemento, lakip ang City Mayor’s Office, City Legislative Department, Liga ng mga Barangay, DAKAK by the Mercados, Dapitan City Water District, Jose Rizal Memorial State University, Department of Education, Jonggies’ Belgian Waffles, Lawaan Café and Restaurant, ug Kimrey Masonry Trading.
Sa ilang presentasyon, gipasiugda sa matag kandidata ang ilang mga adbokasiya nga nagpunting sa pagpangulo, pagpalambo sa kabatan-onan, edukasyon, pag-atiman sa kalikupan, ug pagpalambo sa komunidad, nga nagpakita nga ang titulo sa Kinabayo Queen dili lamang naglangkob sa katahom kondili usab sa serbisyo ug responsibilidad.
Pagakoronahan ang usa kanila isip Kinabayo Queen 2026 sa Coronation Night karong umaabot Hulyo 23, diin siya mahimong opisyal nga ambassador sa turismo, kultura, ug serbisyo sa komunidad sa Dapitan City.(IKEN B.GULLEM)
Source: Dapitan City Government