Gipangunahan sa Department of Agrarian Reform (DAR)-Zamboanga del Norte ang serye sa pulong-pulong sa mga lungsod sa Manukan, Jose Dalman, Tampilisan, ug Kalawit aron atubangon ug masulbad ang nagkadaiyang isyu nga may kalabutan sa yuta ug agrarian reform.
Atol sa mga panagtigom, gihisgutan ang mga panaglalis sa landholding, pagpanag-iya sa yuta, tenancy concerns, ug uban pang agrarian issues, samtang gihatagan usab og kahigayonan ang mga Agrarian Reform Beneficiaries (ARBs) ug uban pang mga hingtungdan sa pagpahayag sa ilang mga kabalaka ug pagpangita og malinawon nga solusyon.
Sa Manukan ug Jose Dalman, gipahigayon ang mediation sa panagbangi sa utlanan sa yuta nga naglambigit sa mga ARBs ug tenants, samtang sa Kalawit gihusay ang panaglalis tali sa mga manununod ug aktuwal nga mga mag-uuma.
Matud sa DAR-Zamboanga del Norte, ang maong mga pulong-pulong kabahin sa padayon nga paningkamot sa ahensya sa pagpalig-on sa dayalogo sa komunidad ug pagsiguro sa patas, malinawon, ug epektibong pagpatuman sa agrarian reform program.(IKEN B. GULLEM)
Source: DAR Zamboanga del Norte Province