Pagadumugon sa mga Muay Thai athletes ug fight fans ang Zamboanga del Norte Cultural and Sports Center sa Dipolog City karong Agosto 1 alang sa unang edisyon sa Nak Muay Series: The Beginning.
Ipahigayon sa Atlas Muay Thai Promotion ang maong torneyo diin magtagbo ang mga atleta gikan sa nagkalain-laing gym ug komunidad aron ipakita ang ilang kahanas, disiplina, ug determinasyon sulod sa ring. Gilauman nga mahimong higpit ug makalingaw ang matag away.
Labaw sa kompetisyon, tumong sa maong kalihokan ang paghatag og higayon sa mga bag-ong mananambayayong nga mapakita ang ilang abilidad ug makatigom og kasinatian sa Muay Thai. Gisuportahan usab kini sa City Government of Dipolog ug sa Provincial Government of Zamboanga del Norte aron dasigon ang kabatan-onan sa pag-apil sa sports.
Abli ang venue alas sais sa gabii, diin gilauman ang sunod-sunod nga mga away nga magpakita sa talento sa lokal nga mga atleta ug makatabang sa pagpalambo sa grassroots development sa Muay Thai sa Zamboanga del Norte.(JENIFFER JR. DELICA)
Source: Zamboanga del Norte Provincial News Network