Nagpahigayon ang Rural Health Unit sa Salug, uban sa Municipal Disaster Risk Reduction and Management Office, og Basic Life Support ug Automated External Defibrillator training aron mapalig-on ang kahandam sa komunidad sa pag-atubang sa medikal nga emerhensiya.
Atol sa pagbansay, gitudloan ang mga partisipante sa husto nga paghatag og Cardiopulmonary Resuscitation o CPR, paggamit sa Automated External Defibrillator o AED, ug uban pang batakang pamaagi sa first aid alang sa mga biktima sa cardiac arrest ug uban pang emerhensiyang medikal.
Gihimo usab ang hands-on exercises aron mapalambo ang kahanas ug kumpiyansa sa mga partisipante sa paghatag og unang tabang samtang wala pa moabot ang mga medical responders.
Sumala sa RHU, kabahin kini sa padayon nilang paningkamot sa pag-andam sa komunidad pinaagi sa pagbansay ug edukasyon aron mas daghang residente ang andam motabang ug makaresponde sa panahon sa emerhensiya.(JENIFFER JR.DELICA)
Source: Municipality of SALUG