Nakahimo og dakong operasyon ang Balamban Municipal Police Station human madakpan ang giingong nagpadagan sa drug den ug upat pa ka hamtong, samtang tulo ka menor de edad ang luwas nga na-rescue sa usa ka buy-bust operation niadtong Martes, Pebrero 3, 2026 sa Sitio Himungungan, Barangay Cantuod, Balamban, Cebu.
Ang nag-unang suspek nga nailhan sa alyas “Lana,” 70 anyos, walay trabaho ug residente sa maong lugar, nadakpan tungod sa paglapas sa RA 9165 o Dangerous Drugs Act, lakip ang pagpadagan og drug den. Usa pa ka suspek nga alyas “Rex” ang giingong kauban niini, apan wala pa madakpi ug gipangita pa karon sa kapulisan.
Atol sa operasyon, upat ka hamtong ang nadakpan tungod sa pagbisita sa drug den, samtang tulo ka menor de edad ang giluwas sa kapulisan ug giturn-over sa MSWDO alang sa hustong pag-atiman.
Nakumpiskar usab sa kapulisan ang suspected shabu, usa ka .45 caliber nga pusil, mga bala, ug usa ka hand grenade nga daling giturn-over sa EOD Unit para sa luwas nga pagdumala.
Gipasalamatan ni CPPO Provincial Director PCOL Abubakar Udang Mangelen Jr. ang kalampusan sa operasyon ug miingon nga padayonon sa kapulisan ang ilang kampanya batok sa ilegal nga drogas aron mapanalipdan ang komunidad, ilabi na ang kabatan-onan.
Ang tanang nadakpan nga hamtong karon gitanggong na sa Balamban MPS, samtang giandam na ang mga kasong ipasaka batok kanila.
Source: CPPO
I via Renante Socia Lada