Gipahibalo sa Philippine Coast Guard Station Northern Cebu nga gilibkas na ang suspension sa tanang biyahe sa mga sakyanan sa kadagatan ug watercraft sa ilang area of responsibility, sumala sa Sea Travel Advisory nga gipagawas niadtong Pebrero 7, 2026.
Sumala sa Coast Guard, ang desisyon gibase sa Tropical Cyclone Bulletin No. 23F sa PAGASA nga nagpasabot nga ang Low Pressure Area nga gitawag og “Basyang” wala na’y dakong hulga sa Northern Cebu. Ang pag tang-tang sa suspension gihimo subay sa HPCG Memorandum Circular No. 02-23 nga naglatid sa mga lagda sa paglihok sa mga sakyanan sa kadagatan panahon sa grabe nga kahimtangan sa panahon.
Bisan pa man nga gitugotan na ang paglawig, gipahimangnoan gihapon ang mga tag-iya ug tripulante nga magpabiling mabinantayon, magbantay kanunay sa kahimtangan sa panahon, ug magpatuman sa tanang safety measures alang sa kaluwasan sa tanan.
Giawhag usab sa Coast Guard ang halapad nga pagpakaylap sa maong impormasyon ug ang kooperasyon sa tanang concerned agencies ug maritime sector aron mapanalipdan ang kinabuhi ug kabtangan sa dagat.
Source: Coast Guard Station Northern Cebu
I via Renante Socia Lada