Gipakita sa usa ka motorcab driver sa Dipolog City ang panig-ingnan sa pagkamatinud-anon human iyang boluntaryong gibalik ang usa ka nawagtang nga pitaka sa Dipolog City Traffic Management Office niadtong Pebrero 2, 2026. Ang driver mao si Robert Buhian Cajocon, 49 anyos, residente sa Limbonga, Gulayon, Dipolog City.
Ang gamay nga itom nga pitaka nga iyang nakit-an sulod sa iyang motorcab nga may plate number J966SD naglangkob og pito ka libo ug pito ka gatos pesos nga cash ug daghang importante nga identification cards. Human sa beripikasyon sa Traffic Management Office, napamatud-an nga ang tag-iya sa pitaka mao si Sonny M. Dumat-ol.
Nakuha dayon sa tag-iya ang iyang pitaka sa maong adlaw usab, atubangan sa TMO personnel nga si Ruther Regañon. Ang buhat sa maong motorcab driver gipasalud-an isip ehemplo sa integridad sa mga public transport driver ug pahinumdom nga ang pagkamatinud-anon buhi gihapon sa komunidad.(JENIFFER JR. DELICA)
Source: Dipolog City Government