Lain na usab nga kalamposan ang na-angkon sa kagamhanang lokal sa Dipolog human kini napasidunggan isip “Most Lovable City of the Philippines” human mitumaw isip National Winner sa ONE PLANET CITIES CHALLENGE.
Kining duha ka pasidungog ang gidawat mismo ni Mayor Uy gikan sa World-Wide Fund for Nature (WWF) sa “Cities and the NDC” Forum nga gipahigayon Martes, Disyembre 6, 2022 didto sa Marco Polo Ortigas, sa dakbayan sa Pasig.
Ang One Planet City Challenge maoy usa ka mahigala-ong indigay sa tibuok kalibotan nga gilusad sa WWF aron sa pag-ila sa mga dakbayan alang sa ilang gihimong mga lakang ug paglantaw kon kini ang nahasubay pa sa mga katuyu-an nga gitakda dinha sa Paris Agreement dinha sa pagkunhod sa climate change.
Dinha sa OPCC, ang mga dakbayan ang gidasig sa pagpadayag sa ilang mga Best Practices ug mga plano nga makatabang sa pagpakunhod sa epekto sa climate change ug sa pagmugna og kausaban kalabot niini. Ang mga nahimong finalists niini ang gi-ebalwar sa International Jury Panel kansang mga miyembro maoy eksperto dinha sa natad sa urban sustainability dinhi sa tibuok kalibotan.
Ang Dipolog milamang sa laing duha ka mga finalists nga mao ang dakbayan sa Quezon ug Davao, uban sa laing 13 ka mga kwalipikadong dakbayan dinhi sa nasud.
(Source: Dipolog City Government Facebook page)