Gipahigayon sa Sangguniang Panlalawigan sa Zamboanga del Norte ang regular nga sesyon niadtong Hulyo 20, nga gipangulohan ni Presiding Officer Vice Governor Julius Napigquit uban sa pagtambong sa mga board members diin gihisgutan niini ang mga resolusyon ug mga isyung may kalabutan sa interes sa katawhan.
Atol sa Privileged Time, gisang-at ni Board Member Jojo Documento ang usa ka resolusyon nga naghatag og pag-ila kang Dr. Antonio Edaon Bryce N. Enriquez human makasulod sa Top 9 sa Physician Licensure Examination uban sa 88.25 porsyentong rating. Ang maong resolusyon nagtumong sa pagpasidungog sa iyang talagsaong kalampusan ug pagdala og dungog sa Zamboanga del Norte.
Gipatin-aw usab sa mga representante sa Zamboanga del Norte Electric Cooperative (ZANECO) ang kasamtangang electricity rates ug ang mga hinungdan nga nakaapekto sa bayranan sa kuryente. Gitubag usab nila ang mga pangutana ug mga kabalaka nga gipataas sa mga board members aron mas mapalawom ang pagsabot sa publiko sa isyu.
Samtang, pinaagi sa regular nga sesyon, nagpadayon ang Sangguniang Panlalawigan sa pagrepaso sa mga resolusyon ug paghisgot sa mga isyung nagkinahanglan og aksyon isip kabahin sa ilang katungdanan sa paghimo og mga polisiya ug mga lakang alang sa kaayohan sa mga lumulupyo sa Zamboanga del Norte.(IKEN B. GULLEM)