Gidasig ang mga lokal nga pangagamhanan sa Zamboanga del Norte nga mas pahimuslan ang Public-Private Partnership (PPP) isip paagi aron mapadali ang pagpatuman sa dagkong proyekto nga dili lamang magsalig sa pondo sa gobyerno.
Gipasiugda kini atol sa MinDA Public-Private Partnership Roadshow: Briefing with Local Chief Executives on PPP, nga gipahigayon niadtong Agosto 19 sa Plenary Hall sa Zamboanga del Norte Convention and Exhibition Center.
Matud ni Mindanao Development Authority (MinDA) Director III Joan Barrera, Planning, Policy and Project Development, ang maong programa gitumong aron mas masabtan sa mga local government unit (LGU) kung unsaon pagpalambo ug pagpatuman sa mga proyekto pinaagi sa pakigtambayayong sa pribadong sektor.
Sumala ni Barrera, ang PPP Program una nang napahimuslan sa dagkong mga siyudad sa Mindanao, ug karon gitumong sa MinDA nga ipaabot kini sa mga probinsya nga adunay dagkong proyekto apan limitado ang kapasidad sa pondo sa lokal nga pangagamhanan.
Pinaagi sa PPP, matabangan ang mga LGU sa pag-ila, pagplano ug pag-andam sa mga proyekto nga mahimong ipatuman uban sa pribadong sektor. Mahimo usab nga makatampo ang mga pribadong kompanya sa financing, construction ug operasyon sa mga proyekto.
Lakip sa mga proyekto nga mahimong matutokan ang transportasyon, suplay sa tubig, enerhiya ug uban pang importanteng serbisyo publiko.
Gihatagan usab og gibug-aton ang pag-andam og mga “bankable” projects—mga proyekto nga adunay klarong feasibility ug potensyal nga madani ang mga pribadong investor tungod sa lig-on nga plano ug posibilidad nga mapadayon ang operasyon niini.
Gidayeg ni Governor Darel Dexter T. Uy ang inisyatiba sa MinDA, ilabina tungod sa kamatuoran nga limitado ang pondo sa mga LGU alang sa dagkong proyekto.
Matud sa gobernador, usa ka dakong oportunidad ang PPP aron mapadali ang pagpatuman sa mga proyekto pinaagi sa paghiusa sa resources ug kapasidad sa gobyerno ug pribadong sektor.
Gipasiugda usab ni Uy nga dugay nang gigamit ang PPP sa ubang mga nasud, busa ang mga LGU sa Zamboanga del Norte angay nga mosusi ug mopahimulos sa maong pamaagi aron mapadali ang pag-uswag sa probinsya.(IKEN B. GULLEM)
Source: Zamboanga del Norte Provincial News Network