Gisusi mismo ni Mayor Evelyn “Belen” T. Uy ang kahimtang sa seguridad, imprastraktura ug kaayohan sa mga estudyante atol sa iyang pagbisita sa nagkalain-laing eskwelahan sa Dapitan City.
Gipasiugda sa mayor nga ang pagpanalipod sa kaayohan sa mga estudyante, ilabina sa ilang mental ug emosyonal nga kahimtang, nagkinahanglan og hiniusang paningkamot sa mga ginikanan, eskwelahan ug komunidad.
Una niyang gibisita ang Jose Rizal Memorial State University (JRMSU) Main Campus, diin gidawat siya ni University President Dr. Maria Rio Abdon-Naguit. Gisusi ni Mayor Uy ang mga plano sa unibersidad ug ang kasamtangang safety ug security protocols sa campus.
Atol sa ilang panag-istoryahanay, gihatagan og gibug-aton sa mayor ang kamahinungdanon sa character building ug values formation. Gidasig usab niya ang eskwelahan nga palig-onon ang values ug religious education aron mas maandam ang mga estudyante sa mga hagit sa modernong panahon.
Misunod ang Rizal Memorial Institute of Dapitan City, Inc. (RMIDCI) diin nakigkita si Mayor Uy kang School Principal Angelita V. Elumba. Gihisgutan nila ang mga lakang aron mapalig-on pa ang seguridad sulod sa campus ug ang mga rekomendasyon alang sa mas luwas nga learning environment.
Ang kataposang giadtoan ni Mayor Uy mao ang Dapitan City National High School (DCNHS), diin iyang gisusi ang mga posibleng lugar alang sa umaabot nga mga school projects.
Gawas sa seguridad ug student welfare, gihatagan usab og pagtagad sa mayor ang pagpalambo sa imprastraktura aron madugangan ang kapasidad sa eskwelahan ug mapaayo ang mga pasilidad nga magamit sa mga estudyante.(IKEN B. GULLEM)
Source: Dapitan city Government