Mas napalig-on ang panglantaw sa Zamboanga del Norte nga mahimong mas lig-on nga destinasyon sa turismo human gidawat ni Governor Darel Dexter T. Uy ang mga senior official sa Philippine Air Force (PAF) ug Philippine Army atol sa courtesy call sa Governor’s Office niadtong Miyerkules sa buntag, Agosto 19.
Gipangulohan ni Major General (MGEN) Gerold N. Gagan, PAF, Deputy Chief of Staff for Reserve Force Development (J9), ang delegasyon. Kauban niya sila COL Glen Mark R. Cabalquinto, PAF, Chief sa Plans, Programs and Policies Division, OJ9, ug COL Venjie Pendon, PAF.
Mitambong usab sila COL Mandy T. Libertino, PA, Director sa 902nd Community Defense Center (902CDC), 9th Regional Community Defense Group (9RCDG), Reserve Command, Philippine Army (RCPA); CPT Noel G. Magon (INF), PA, Civil-Military Operations Officer; MAJ Julieto J. Pollescas (INF), PA, Executive Officer; ug LTC Jessie G. Bergonia, INF (GSC), PA, Commanding Officer sa 97th Infantry “Kalasag Lahi” Battalion.
Gihisgutan sa miting ang mga posibleng plano ug kalamboan alang sa mga airport ug seaport sa probinsya, ilabina ang ilang potensyal nga ikatampo sa turismo, mas sayon nga pagbiyahe, ug pag-uswag sa ekonomiya.
Gipaambit ni Governor Darel ang iyang panglantaw nga mahimong international airport ang Dipolog Airport sa umaabot. Matod niya, makatabang kini sa pagpalapad sa koneksyon sa Zamboanga del Norte ug makahatag og bag-ong mga oportunidad alang sa turismo ug negosyo.
Gipasiugda niya ang panginahanglan nga susihon pag-ayo ang kapasidad sa matag tourist destination, lakip ang igo nga mga kasilyas ug uban pang basic facilities, parking areas, ug ang kapasidad sa mga lugar sa pagdawat sa nagkadaghang mga bisita.
Tungod sa daghang coastal communities, natural attractions ug nagkalain-laing marine resources, daghan pa usab, matod sa gobernador, ang diving destinations sa Zamboanga del Norte nga mahimong tukion ug mapalambo.(IKEN B. GULLEM)
Source: Zamboanga del Norte Provincial News Network