Gisugdan na ang pormal nga pag-turn-over sa pipila ka nahuman nga proyekto sa Barangay Mauswagon,La Liberatad, Zamboanga del Norte ngadto sa Municipal Engineer’s Office alang sa tukmang inspeksyon, pag-monitor ug technical supervision nga gipahigayon niadtong Septiyembre 7,2026.
Lakip sa mga proyekto nga gisusi ang partial concreting sa barangay road nga nagpadulong sa Mauswagon Elementary School,ang pagpahimutang sa coral fence sa barangay site ug covered court ug ang playground nga gitukod alang sa mga batang nag-eskwela sa daycare.
Ang maong proyekto gipondohan pinaagi sa pondo sa barangay, nga gitumong sa pagpalambo sa mga pasilidad ug imprastraktura nga direktang magamit sa mga residente.
Pinaagi sa technical inspection ug monitoring sa Municipal Engineer’s Office, gilauman nga masiguro ang kalidad sa mga nahuman nga pasilidad ug ang pagsunod niini sa mga gikinahanglang teknikal nga sumbanan.
Gipasiugda usab nga ang mga proyekto bunga sa koordinasyon ug panagtambayayong sa mga opisyal sa barangay, uban sa tumong nga ang pondo sa komunidad mapadulong sa mga programa ug pasilidad nga adunay konkretong kaayohan alang sa katawhan.
Gilauman nga pinaagi sa padayon nga pagtinabangay sa barangay ug lokal nga panggamhanan, mas mapaayo pa ang mga serbisyo ug imprastraktura nga gikinahanglan sa komunidad.(MEDALYN U. BORJA)
Source: Mauswagon La Libertad Zdn