Personal nga gikumusta ni Gov. Darel Dexter Uy ang mga pasyente sa Zamboanga del Norte Medical Center (ZNMC) ug gisusi ang mga bag-ong pasilidad isip kabahin sa paghatag og prayoridad sa serbisyo sa panglawas sa iyang unang tuig sa pagdumala sa probinsya.
Gibisita sa gobernador ang mga pasyente sa ZNMC Annex Building nga bag-ohay lang mipailalom sa libreng laparoscopic surgery. Nakig-estorya siya sa mga pasyente aron mahibal-an ang ilang kahimtang ug kasinatian sa pag-avail sa serbisyo sa ospital, ug nanghatag usab og mga prutas isip suporta sa ilang pagpaayo.
Sumala kang Gov. Uy, padayon nga gipauswag sa provincial government ang kahimtang sa mga ospital pinaagi sa pagmodernisar sa mga pasilidad ug paglig-on sa serbisyong medikal aron mas mapauswag ang pag-atiman sa mga pasyente.
Matod pa niya, ang mas maayong imprastraktura ug modernong kagamitan makatabang dili lamang sa mga pasyente apan usab sa mga doktor, nars ug ubang healthcare workers sa paghatag og episyenteng serbisyo.
Mikuyog usab sa gobernador sa pagbisita sila si Vice Governor Julius Napigquit, mga miyembro sa Sangguniang Panlalawigan, ZNMC Hospital Administrator Dr. Esmeralda Nadela, mga doktor, nars, ug ubang kawani sa ospital.(IKEN B. GULLEM)
Source: Zamboanga del Norte Provincial News