Gipasalig ni Zamboanga del Norte Governor Darel Dexter T. Uy ang padayon nga suporta sa Provincial Government alang sa 441 ka pamilya sa Dapitan City nga opisyal nang nakagradwar gikan sa Pantawid Pamilyang Pilipino Program (4Ps) sa “Pistang Tagumpay” graduation ceremony nga gipahigayon niadtong Hunyo 30 sa Jose Rizal Memorial State University (JRMSU) Covered Court.
Sa iyang mensahe, gipasiugda ni Gov. Uy nga ang pagtapos sa 4Ps dili katapusan sa pag-atiman sa gobyerno, kondili sinugdanan sa mas lig-on nga panagtambayayong aron mapadayon ang panginabuhian ug kalamboan sa matag pamilya.
Matod sa gobernador, padayon nga ipatuman sa Provincial Government ang mga programa sa edukasyon, panginabuhian ug community development aron matabangan ang mga benepisyaryo nga mapadayon ang ilang kalig-on sa ekonomiya.
Ang kalihokan, nga gipangunahan sa Department of Social Welfare and Development (DSWD) ug City Social Welfare and Development Office (CSWDO), nagtumong sa pagpasidungog sa mga pamilyang nakab-ot ang kahimtang nga dili na magsalig sa ayuda sa programa.
Mitambong usab sa maong kalihokan si Dapitan City Mayor Evelyn “Belen” T. Uy, kinsa mipahibalo sa nagkalainlaing oportunidad sa panginabuhian sa siyudad, lakip ang abaca production training, trabaho sa umaabot nga sardinas processing facility, ug mga entrepreneurship training pinaagi sa Training and Enhancement Center.
Isip dugang nga suporta, nakadawat ang matag gradwar nga pamilya og lima ka kilo nga bugas ug vegetable seedling kits aron makatabang sa ilang panginabuhian ug seguridad sa pagkaon.(IKEN B. GULLEM)
Source: Zamboanga del Norte Provincial News Network