Subay sa tema nga “United for Youth : The Student Shield Against Illegal Drugs, Stronger Together for a Safe and Healthy School” gipahigayon niadtong Septyembre 1, 2026 ang dakong pagtudlo mahitungod sa kahibalo ug paglikay sa makadaot nga epekto sa droga didto sa Sindangan National High School.
Ang kalihokan gipangulohan sa Lokal nga Pamahalaan sa Sindangan, kauban ang PNP Drug Enforcement Group (PNP DEG), Philippine Drug Enforcement Agency (PDEA), Department of Health (DOH), Sindangan Municipal Police Station, ug uban pang kasosyo sa katilingban. Gipaniguro niini nga ang kahibalo makatabang sa pagpalig-on sa panalipod sa kabataan batok sa kadaot nga gidala sa illegal nga droga.
Gitambongan kini ni Mayor Hon. Glona G. Labadlabad, ni Gobernador Hon. Darel Dexter T. Uy nga maoy PADAC Chairman, ug ni Engr. Dioscoro G. Endab, PADAC Focal Person. Kauban usab nila si Dr. Lucela E. Balbuena, Principal IV sa Sindangan National High School, si PLT Mon Jay A. Ditchon, Team Leader sa ZDN PNP DEG SOU 9, ug si PLTCOL Jose F. Rivero III, Hepe sa Pulisya sa Sindangan.
Ang mga opisyal ug eksperto gikan sa PDEA, DOH, PNP DEG, ug uban pang ahensya naghatag usab og mga pagtudlo ug impormasyon.
Pinaagi sa mga pagtudlo, bukas nga panaghisgutan, ug pagtubag sa mga pangutana, nakat-onan sa mga estudyante ang tinuod nga katalagman nga dala sa illegal nga droga ug ang dakong kahinungdanon sa paghimo sa saktong pagpili alang sa mas himsog ug mas hayag nga kaugmaon.
Ang tibuok lungsod sa Sindangan nagpabilin nga lig-on sa iyang saad nga magtinabangay uban sa mga eskwelahan, pamilya, ahensya sa balaod, ug tibuok katilingban, aron mapanalipdan ang kabataan ug matukod ang usa ka komunidad nga luwas, himsog, ug gawasnon sa druga.(MEDALYN U. BORJA)
Source: Municipality of Sindangan