Malampusong gipahigayon ang 1st Quarter Meeting sa mga Information Officers gikan sa duha ka dakbayan ug 16 ka lungsod sa probinsya sa Zamboanga del Norte didto sa Hall 3, 2nd Floor, Provincial Capitol sa Dipolog City.
Mokabat sa 18 ka Information Officers gikan sa Dipolog ug Dapitan City ug sa nagkalain-laing lungsod ang mitambong sa maong panagtigum. Gipangulohan kini sa Provincial Information Center ubos sa pagdumala ni OIC Rosemarie Miranda.
Mipahayag usab pasalamat si OIC Miranda sa aktibong partisipasyon sa mga Information Officers ug gipasiugda ang kahinungdanon sa husto ug responsableng pagkatag sa impormasyon kabahin sa mga programa ug proyekto sa matag Local Government Unit (LGU).
Lakip sa mga resource speakers si Roney Pacilan, Provincial Relations Officer ug beteranong broadcaster, nga mitalakay sa “News Writing for Radio Broadcasting.” Mituki usab si Engr. Ruel Tabada, General Manager sa Dipolog City Water District ug photojournalist, sa “Basic Video and Photography for Social Media,” diin gihatagan og praktikal nga tips sa pagkuha og hulagway, pag-edit, ug pag-engganyo sa audience.
Ang kalihokan kabahin sa paningkamot sa kagamhanang probinsyal ubos sa liderato ni Governor Darel Dexter T. Uy aron mapalambo ang kapasidad sa mga Information Officers sa tibuok probinsya.(IKEN B. GULLEM)
Source: Zamboanga del Norte Provincial News Network