Mokabat sa 146 ka mga pasyente ang unang nalista ug direktang nakabenepisyo sa libreng Medical Mission nga gipahigayon sa Zamboanga del Norte Medical Center (ZNMC), ilawom sa programa ni Governor Darel Dexter T. Uy alang ning bulan sa Pebrero.
Sugod alas-9:00 sa buntag, nagsugod ang pagdawat sa mga pasyente gikan sa nagkalain-laing lungsod sa probinsya ug misaka pa ang gidaghanon sa mga nakapahimulos samtang nagpadayon ang kalihokan hangtod sa hapon.
Sumala ni Dr. Jonathan Navarro, ang binulan nga libreng konsultasyon nagtinguha nga mas daghang katawhan, ilabi na ang mga walay igong ikagasto sa pagpangayo og medikal nga serbisyo, ang maatiman. Matud pa niya, kadaghanan sa mga pasyente nga nalista karon mga surgical cases nga susihon ug ilakip sa talaan sa libreng operasyon kon kinahanglang operahan.
Ang mga nakabenepisyo naglakip sa mga residente gikan sa nagkalain-laing distrito sa Zamboanga del Norte, lakip ang mga nagbiyahe pa gikan sa layo nga lungsod aron mopahimulos sa libre nga serbisyo.
Ang ZNMC, ubos sa pagdumala ni Hospital Administrator Dr. Esmeralda Nadela, nagpadayon sa paghatag og mas pinalapad nga serbisyong medikal isip Level 2 nga tambalanan sa probinsya.
Bisan sa kadaghan sa mga pasyente, malinawon nga napahigayon ang kalihokan, diin ang gatosan ka mga benepisyaryo nagpaabot sa ilang turno aron makadawat og libreng konsultasyon ug pag-atiman gikan sa medical team.(IKEN B. GULLEM)
Source: Zamboanga del Norte Provincial News Network