Aron mapauswag sa kagamhanang probinysal ning lalawigan sa Zamboanga del Norte ang kahapsay, kalinaw ug segurdidad sa publiko, mihimo ug New Year’s Call ngadto ni Governor Rosalina “Nanay Nene” Jalosjos ang mga hepe sa kapulisan sa tibuok probinsya pinanguluhan ni Provincial Director PCol. Glenn Dulawan, Enero 6, niining tuiga sulod sa Provincial Guest’s House, Turno ning dakbayan.
Gisaysay ni PD Dulawan nga matag unang buwan sa bag-ong tuig, adunay pagahimuong panagtigum o kortesiya sa mga Chief Of Police sa matag kalungsuran ngadto sa gobernador.
Niini, gibutyag ni PD Dulawan nga ang Zamboanga del Norte Police Provincial Office (ZNPPO) adunay mga talagsaong programa ning tuiga nga ilang gihan-ay ug gitanyag ngadto ni Governor Jalosjos alang sa kalamboan ug kaayuhan sa katawhan ning probinsya.
Lakbit saysay ni PD Dulawan nga ang kwerpo sa kapulisan ning lalawigan hugot nga mipatuman sa pagpakigbatok sa illegal nga druga aron mamahimong drug-free ang ZaNorte.
(Source: Provincial Information Center Zanorte Facebook page)