Ang Oslob maoy unang lokal nga panggamhanan sa Sugbo karong tuiga nga na-review ang iyang Comprehensive Land Use Plan (CLUP) sa Cebu Provincial Land Use Committee (PLUC) niadtong Pebrero 26, 2026.
Sa maong miting, gisusi sa PLUC ang plano sa Oslob ug naghatag og mga suhestiyon aron mas mapauswag ug mapino pa ang dokumento. Ang CLUP maoy magsilbing giya sa paggamit sa yuta sa lungsodākung asa itukod ang mga balay, negosyo, umahan, o mga industriyal nga lugar hangtod sa tuig 2034.
Mitambong sa deliberasyon ang nagkalain-laing ahensya sa gobyerno sama sa Department of Human Settlements and Urban Development, Department of Agrarian Reform, Department of Environment and Natural Resources, Department of Agriculture, ug Department of Trade and Industry.
Nisuporta usab ang nagkalain-laing opisina sa Cebu Provincial Government aron matabangan ang Oslob sa pag-ayo sa ilang draft nga plano.
Human sa miting, gilauman nga sundon sa Oslob ang mga rekomendasyon ug isumiter pag-usab ang giusab nga dokumento sa Provincial Planning and Development Office (PPDO). Ang PPDO maoy magpadala niini balik sa mga ahensya nga naghatag og suhestiyon aron masiguro nga nasunod ang tanan.
Sumala sa Local Government Code of 1991, adunay gahum ang mga LGU sa pag-reclassify sa ilang agricultural lands, apan kinahanglanon kini maaprobahan pinaagi sa zoning ordinance nga ipasar sa municipal council ug aprobahan usab sa Cebu Provincial Board.
Ang kalihokan gipangulohan ni Atty. Kevin Dinsay alang kang Gob. Pamela S. Baricuatro. Kabahin kini sa paningkamot sa probinsya nga mapalambo ang maayong pagdumala ug masiguro nga organisado ang pag-uswag sa mga lungsod sa Sugbo.
Source: Cebu Province PIO
I via Renante Socia Lada