Walo ka mga indibidwal kinsa ang nakabenpisyo sa “Medical Assistance” gikan sa kagamhanang lokal ang nipaabot ug pasalamat ngadto kang Mayor Darel Dexter T. Uy didto sa iyang buhatan niadtong Mayo 29,2024.
Ang maong programa, gisugdan kini kanhi Gobernador Berto Uy, ug kasamtangan karon nga gipadayon sulod sa termino ni Mayor Darel Uy alang sa mga katawhan dinhi sa siyudad nga tinuod nga nanginahanglan sa tabang medikal, gumikan sa kawad-on sa ikagasto sa pagpatambal.
Gumikan niini gikalipay sa mga katawhan nga mao ang mga resipyente uban sa ilang pamilya nga nagkinahanglan og mga espesyalista nga wala dinhi sa siyudad, sa pagproseso sa pagtambal nga nagkinahanglan og dakong kantidad ilabina sa mga critical cases sama sa cancer, surgical operations ug giisip kini nga usa ka dakong tabang kanila sa pagsagubang sa mga galastuhon sa pagpatambal sa mga pasyente.
Ang mga nasangpit nga mga indibidwal nga nahatagan sa tabang medikal gilangkuban nila ni Jay B. Claros, Gemma I. Gatona, Wiljory Balmoria, Rohan M. Curay, Rodolfo Lacquio, Carmelita Perez, Julievy Fernandez ug si Dinmark G. Balico, nga adunay Congenital Heart Disease nga na-operahan didto sa Philippine Heart Center, sa kaulohang Maynila.
Si Medical Team Leader, Ms. Herdina G. Crisostomo, nagkanayon, nga ang nasangpit nga mga indibidwal nga pulos lumulupyo ning siyudad,ang nalugwayan dili lamang sa medical expenses, kon dili, apil usab ang libreng pasahe sa barko, libreng puy-anan sa Cebu ug Manila diin gidala ang mga benepisyaryo nga pasyente nga nagkinahanglan sa pagpatambal. (Medalyn U. Borja)
(Source: Dipolog City Government)