Gipasalamatan ni Mayor Darel Dexter T. Uy ang mga health workers sa dakbayan sa Dipolog nga naglangkob sa mga nurses, midwives ug sanitation inspectors, tungod sa kanunay nga pagtabang niini aron ma-promote ang healthy lifestyle ingon man sa pagpaningkamot nga mapugngan ang pagdaghan sa COVID-19 cases ug uban pang mga sakit.
Kini ang iyang gipadayag sa “Launching sa Non-Communicable Diseases” (NCD) Program Nobyembre 25 didto sa Dipolog Boulevard.
Ang paglusad niini, sumala ni Ms. Cynthia Marie Luntayao, NCD Program Coordinator sa City Health Office (CHO), nagtumong sa pagkunhod sa NCD diseases sama sa hypertension, chronic respiratory disease, cancer ug diabetes nga maoy kasagarang sakit nga gihambin sa kadaghanan.
Alayon niini, gi-apod-apod ang mga wellness paraphernalias nga naglangkob sa Bluetooth speaker, lapel ug tarpaulin ngadto sa 26 ka mga Barangay Health Stations (BHS) sa siyudad, nga maoy gamiton alang sa pagpromote sa health wellness program nga Zumba dance fitness.
Isip suporta ning nasangpit nga aktibidad, madasigon nga nag-zumba ang mga health workers sa siyudad sa wala pa gitak-op ang nasangpit nga kalihukan.
(Source: Dipolog City Government Facebook page)