Gipaabot ni Dapitan Mayor Evelyn Uy ang iyang mainitong pagpangumusta ug pagdayeg kang 6-anyos chess player Elisha A. Romarate tungod sa iyang talagsaong nahimo sa 24th ASEAN Age Group Chess Championship sa Singapore niadtong Agosto 7 hangtod 17, 2026.
Nakuha ni Elisha ang impresibong 8 ka gold medals, 3 ka silver medals, ug 1 ka bronze medal, nga nagpakita sa iyang talagsaong talento, pokus, disiplina, ug determinasyon bisan sa iyang batan-on nga edad.
Para kang Mayor Uy, ang kalampusan ni Elisha dili lamang personal nga kadaugan, kondili usa usab ka garbo alang sa iyang pamilya, komunidad, ug mga tawo nga mitabang sa iyang paglambo isip batang atleta.
Gihatagan usab og pag-ila ni Mayor Uy ang amahan ug trainer ni Elisha nga si NM Geronimo Romarate, iyang coach sa Estaka Central School nga si FA Sendelyn L. Magallanes, ug Estaka Punong Barangay Irvin Banga alang sa ilang padayong paggiya ug suporta.
Gidasig usab ni Mayor Uy si Elisha nga ipadayon ang iyang gugma sa chess, magpadayon sa pagkat-on, ug mosalig sa iyang kaugalingong abilidad. Ang iyang nahimo nagsilbing inspirasyon sa ubang kabatan-onan nga adunay damgo sa sports ug ubang natad.(IKEN B. GULLEM.
)
Source: Mayor Belen Uy