Halos walay kabutangan sa iyang gibating kalipay si Leon Postigo Mayor Ronnie Jamora dihang iyang nakita ang paghidangat sa Gugma-Ayuda Team ni Governor Rosalina “Nene” Jalosjos sa iyang lungsod.
Pinangunahan ni Provincial Administrator Mr. Wilbert “Jojo” Magallanes ug sa tigpamaba sa gobernador nga si Atty. Ivan Patrick Ang ug Provincial Engineering Office Head, Engr. Rey Eguia, uban sa mga nagkalain-laing buhatan sa kapitolyo Probinsyal nagpahigayon ug community outreach program sa Barangay Sipakong, Leon Postigo, Zamboanga del Norte.
Kini didto gipahigayon sa covered court sa maong Barangay Agosto 21, 2023.
Gawas sa Barangay Sipakong, ang ubang mga barangay nga nakapahimulos niini mao ang Barangay Sta. Maria, Tinuyop, ug Nasibac.
Isip representante ni Governor Jalosjos, giseguro ni Provincial Administrator Magallanes ang kaandam sa Kagamhanang-Probinsyal ilalom sa administrasyon ni Nanay Nene nga tabangan ug suportahan ang panginahanglan sa tanang mga taga Zamboanga del Norte.
Lakip sa napahimuslan sa katawhan sa 4 ka mga barangay mao ang 3,000 ka paketeng tag-singko ka kilong bugas nga gihatag sa Provincial Social Welfare and Development Office (PSWDO) nga gipanguluhan ni Dr. Jose “Pepe” Mante uban ang lamiang champorado.
Samtang ang mga doctor, dentista nurses ug ubang mga health personnel sa Leon Postigo Rural Health Unit ug Provincial Disaster Risk Reduction and Management Office milugway usab ug libreng konsultasyon, ibot sa ngipon ug tuli sa mga kabataan, ingon man libreng mga tambal.
Adunay 432 ang nakapahimulos sa libreng medical consultation ug tambal, 89 ang naibtan og ngipon, 64 ka mga bata natuli ug 9 ang nahatagan ug Covid-19 vaccination.
Sa laing bahin, nanghatag usab ang Office of the Provincial Agriculturist ug 1,500 ka pakete sa liso sa nagkalain-laing matang sa mga utanon, 300 ka paketeng binhi sa mais ug 200 ka paketeng organic fertilizer.
Libreng alot usab ang gilugway sa mga personahe sa Municipal Disaster Risk Reduction and Management Office(MDRRMO).
Gawas sa ayuda, libreng paniudto usab ang gidalit sa Team Ayuda ngadto sa tanang mitambong sa Gugma-Ayuda ni Nanay Nene Community Outreach Program.
(Source: Provincial Information Center ZaNorte Facebook page)